ವಿನಾಶ ಕಾಲೇ

 ಇದೀಗ ನಮ್ಮಲ್ಲಿ ಇಡೀ ದಿನ ಮಳೆ ಸೊಬಗು. 

ಮುಂಗಾರಿನ ಹನಿಗಳು 

ಕಿವಿ ಬಿರಿವ ಡೋಲು, ಕೋಲು 

ಮಿಂಚು ಏನಾಗಿದೆ ಬಾನಿಗೆ? 

ಅದು ಮೆರವಣಿಗೆ, ಕರೆತರಲು 

ಮುಂಗಾರನು ಮೇದಿನಿಗೆ 

****-

ಭೋರ್ಗರೆಯಿತು ಬಿರುಗಾಳಿ ಮಳೆ 

ತಿಕ್ಕಾಡಿದವು ಗಿಡ ಮರಗಳು 

ಭುವಿಯ ಸಂಧಿಗೊಂದಿಗಳಿಂದ 

ದಿಗ್ಗನೇ ಕಣ್ತೆರೆದವು ತೊರೆಗಳು 

****

ಧಾರೆಮಳೆಗೂ ಉಂಟು 

ಸುರ ಲಯ ಸಿಂಗಾರ 

ಕೇಳು,  ಆಲಿಸಿದರದು

ರಾಗ  ಮೇಘಮಲ್ಹಾರ 

****

ಯಾರೆಂದರು ಮಳೆಯೆಂದರೆ

 ಮುಸಿ ಮುಸಿ ಅಳುವೆಂದು? 

ಕಾದು ಕಂಗೆಟ್ಟ ನೆಲದೊಡಲಿಗದು 

ಮುಗಿಲು ಸುರಿವ ಅಮೃತ ಬಿಂದು 

****

ಸುರಿದಾಗ ಮೊದಲ ಮಳೆ 

ನಿರುಕಿಸಿದೆ ಎಲ್ಲೆಡೆಗೆ 

ಕಮ್ಮನೆ ನುಗ್ಗಿತು ಮಣ್ಣ ಪರಿಮಳ 

ಹೊಸ ಹಸಿರು ಹೂ ಕವನ 

****

ರಾಜೀವ ಅಜ್ಜೀಬಳ